Атырау қаласы карантинге жабылмақ
30 наурыздан бастап Атырау қаласы да карантинге жабылмақ. Бұл туралы Атырау облысы әкімдігінің баспасөз қызметі хабарлады.
Бұған дейін Алматы мен Нұр-Сұлтан қаласы карантинге жабылған. Шымкент пен Ақтауда жұрттың сыртқа шығуына шектеу қойылған. Ал 30 наурыздан бастап Қарағанды, Шахтинск, Саран, Абай, Теміртау және Атырау қаласы карантинге жабылмақ. Қарағанды облысында жеті, Атырауда алты адамнан вирус табылған.
Коронавирус Батыс Қазақстан облысына да жетті
Қазақстан денсаулық сақтау министрлігінің 29 наурыз 16:40-тағы дерегіне сай, Батыс Қазақстан облысында екі адамнан коронавирус табылды.
БҚО денсаулық сақтау басқармасының дерегінше, вирус жұқтырғандардың бірі 48 жастағы әйел, Атырау облысынан келген, ал екіншісі 53 жастағы әйел, Ресейден келген.
29 наурыз Қазақстанда 38 адамға вирус жұққаны белгілі болды. Коронавирус елдің 12 облысында, республикалық маңызы бар үш қаласында тіркелді. Вирус Түркістан облысы мен Қостанай облысында табылған жоқ.
Қазір елде науқастар саны 267 адамға жетті. Барлығы 18 адам (Нұр-Сұлтан - 13, Алматы - 5) аурудан жазылған. 26 наурызда Ақмола облысы Қосшы ауылында 65 жастағы әйел адам коронавирустан қайтыс болған.
Нұр-Сұлтанда тағы төрт адамнан вирус табылды. Қалада 166 науқас бар
Қазақстан денсаулық сақтау министрлігінің 29 наурыз 17:40-тағы дерегіне сай, Нұр-Сұлтанда төрт адамнан коронавирус табылды. Қалада барлығы 166 адам Covid-19 дертіне шалдықты. Қазақстан астанасында 30 наурыздан 5 сәуірге дейін демалыс жарияланбақ, қоғамдық көлік жұмысы тоқтайды.
29 наурыз Қазақстанда 42 адамға вирус жұққаны белгілі болды. Коронавирус елдің 12 облысында, республикалық маңызы бар үш қаласында тіркелді. Вирус Түркістан облысы мен Қостанай облысында табылған жоқ.
Қазір елде науқастар саны 271 адамға жетті. Барлығы 18 адам (Нұр-Сұлтан - 13, Алматы - 5) аурудан жазылған. 26 наурызда Ақмола облысы Қосшы ауылында 65 жастағы әйел адам коронавирустан қайтыс болған.
Қазақстанда вирус жұқтырғандар 284 адамға жетті. Тағы екі адам дертінен айықты
Қазақстан денсаулық сақтау министрлігінің 29 наурыз 23:30-дағы дерегіне сай, елде тағы 13 адамнан коронавирус (Атырау облысында алты, Алматыда үш, Алматы облысында екі, Нұр-Сұлтанда бір, Ақтөбе облысында бір) табылды.
Бұдан бөлек, министрлік Алматыда екі адам Covid-19 дертінен айыққанын хабарлады.
Қазір елде науқастар саны 284 адамға жетті. Барлығы 20 адам (Нұр-Сұлтан - 13, Алматы - 7) аурудан жазылған. 26 наурызда Ақмола облысы Қосшы ауылында 65 жастағы әйел адам коронавирустан қайтыс болған.
ПІКІРЛЕР