Абаев: Бір күнде "карантин режимін бұзған" 138 адам жауапқа тартылды
26 наурызда ақпарат және қоғамдық даму министрі Дәурен Абаев бір күнде Қазақстанда "карантин режимін бұзған" 138 адам әкімшілік жазаға тартылды, 89-ы әкімшілік қамауға алынды деп мәлімдеді.
Төтенше жағдай жарияланған уақыттан бері елде маска мен антисептикті қымбат бағамен сату фактілері бойынша 15 қылмыстық іс (214-бап, "Заңсыз кәсіпкерлікпен айналысу") қозғалған. 40 адам жауапқа тартылған.
Алматы, Нұр-Сұлтан, Шымкентте жұрттың сыртқа шығуына шектеу қойылмақ
Қазақстандағы төтенше жағдай бойынша мемлекеттік комиссия Алматы, Нұр-Сұлтан және Шымкентте 28 наурыздан бастап шектеулерді күшейтті.
- Енді үш қаладағы жұрт жұмысқа, азық-түлік және дәрі алуға ғана шыға алады.
- Парк, жаяу жүргіншілер көшесі, жағалаулар, ойын алаңдары жабылады.
- Қоғамдық көліктердің жұмысы шектеле бастайды.
- Қоғамдық орындарда үш адамнан артық жиналуға болмайды. Бұл шектеудің бір отбасының адамдарына қатысы жоқ.
- Балалар ересектерсіз көшеге шығуға тыйым салынады.
Ақпарат және қоғамдық даму министрі Дәурен Абаев "бұл - комендант сағаты емес" деді.
26 наурыз 16:30-дағы дерек бойынша, бұл күні Қазақстанда 28 адамнан вирус табылды. Оның барлығы Алматы мен Нұр-Сұлтанда.
Елде 13 наурыздан бері 109 адамға вирус жұққаны анықталды: Алматыда - 40 адам, Нұр-Сұлтанда - 61 адам, Қарағандыда - екі адам, Шымкентте - екі адам, Алматы облысында - бір адам, Ақтөбе облысында - бір адам, Жамбыл облысында - бір адам, Солтүстік Қазақстан облысында бір адам.
25 наурызда Алматыда бір, Нұр-Сұлтанда бір науқас дертінен айыққаны хабарланды.
Шымкентте коронавирус жұқтырғандар – шешесі мен баласы. 24 жастағы ер адам Шымкентке Нұр-Сұлтаннан автобуспен келген. Онымен бірге автобуста болған 51 адамның көбі оқшауланды. Дертке шалдыққан екі адам тұратын Абай ауданындағы “Тәуелсіздікке 20 жыл” тұрғын үй массиві де оқшауланды.
Қазақстанда коронавирусқа байланысты 15 сәуірге дейін төтенше жағдай. 19 наурыздан бастап Алматы мен Нұр-Сұлтан қалалары карантинге көшті. Сауда және ойын-сауық орталықтары, тамақтан басқа зат сататын дүкендер мен сауда орындарының, қызмет көрсету орындарының жұмысы тоқтатылды. Карантин режимі кезінде қоғамдық тамақтандыру орындары мен мейрамханалар тұтынушыға ас-суды үйіне жеткізіп береді. 22 наурыздан бастап Алматы мен Нұр-Сұлтан қаласына темір жол және ішкі рейстер тоқтады.
Шымкентте де 28 наурыздан бастап қаладағы әуежай, автовокзал, теміржол возкалы, балабақшалар жұмысы тоқтайды.
Карантин жарияланбаған аймақтардағы сауда орталықтары, базарлар мен қызмет көрсету орындары жұмыс істей береді.
Қазақстанда бір адам коронавирустан көз жұмды
Қазақстанда бір адам коронавирустан қайтыс болды. Бұл туралы 26 наурыз 20:30-да ақпарат және қоғамдық даму министрі Дәурен Абаев хабарлады.
Бұл - Қазақстанда Covid-19 дертінен қаза тапқан алғашқы адам.
Абаевтың сөзінше, қайтыс болған әйел адам Нұр-Сұлтанда емделіп жатқан.
Қарағандыда тағы екі адамнан вирус табылды
26 наурыз кешкі сағат 21.00-дегі дерек бойынша, Қарағанды қаласында тағы екі адамның коронавирус жұқтырғаны белгілі болды. Бұл туралы денсаулық сақтау министрлігі хабарлады.
Қарағанды әкімдігінің дерегінше, екі адам 18 наурызда Франциядан ұшып келген, екеуі де ұшақтан түсе сала, карантинге жатқызылған. Жергілікті билік қаладағы төрт адамнан да карантинде жатқанда вирус табылғанын, сондықтан қалада карантин жариялауға негіз жоғын айтады.
Елде қазір 111 адамға вирус жұққаны анықталды: Алматыда - 40 адам, Нұр-Сұлтанда - 61 адам, Қарағандыда - төрт адам, Шымкентте - екі адам, Алматы облысында - бір адам, Ақтөбе облысында - бір адам, Жамбыл облысында - бір адам, Солтүстік Қазақстан облысында бір адам.
26 наурыз кешкісін Нұр-Сұлтанда бір әйел адам Covid-19 дертінен қайтыс болды. 25 наурызда Алматыда бір, Нұр-Сұлтанда бір науқас дертінен айыққан еді.
ПІКІРЛЕР