ХВҚ Қырғызстанға коронавируспен күресуі үшін 121 млн доллар көлемінде қаржылай көмек береді
Халықаралық валюта қоры (ХВҚ) кеңесі COVID-19 пандемиясымен күреске деп Қырғызстан үкіметіне 120,9 млн доллар көлемінде қаржылай көмек беруді мақұлдады. Қордың реттеуші директоры Кристалина Георгиеваның айтуынша, COVID-19 індеті "Қырғызстан экономикасына ауыр соққы болып тиген және қаржыға тәуелділігін арттырған".
Георгиеваның айтуынша, қаржылық көмек донорлық қолдауға серпін беріп, коронавирусқа байланысты туындаған шығынды жабуға көмектеседі, денсаулық саласына бөлінген қаржыны өз мақсатында пайдалануға мүмкіндік береді.
Осы апта басында ХВҚ эпидемия басталған уақыттан бері ұйымның алғашқы қаржылай көмегін Қырғызстан алуы мүмкін деп топшылаған. Орталық Азия және Таяу Шығыс елдері ХВҚ-дан қаржылық көмек сұраған. Ұйымның айтуынша, бұл өтініштерге жылдам жауап беру жағы қарастырылып жатыр.
Соңғы дерек бойынша, Қырғызстанда 44 адамнан коронавирус табылған. Сарапшылар тест жетіспегендіктен коронавирус жұққан адамдардың нақты санын анықтау мүмкін емес дейді.
Алматыда бір адамнан коронавирус табылды
26 наурыз таңертеңгі сағат 10.25-тегі дерек бойынша, Алматыда тағы бір адамның коронавирус жұқтырғаны белгілі болды. Бұл туралы денсаулық сақтау министрлігі хабарлады. Науқас туралы әзірге толық дерек айтылмайды.
Елде қазір 120 адамға вирус жұққаны анықталды: Алматыда - 48 адам, Нұр-Сұлтанда - 61 адам, Қарағандыда - төрт адам, Жамбыл облысында - үш адам, Шымкентте - екі адам, Алматы облысында - бір адам, Ақтөбе облысында - бір адам, Солтүстік Қазақстан облысында бір адам.
26 наурыз кешкісін Нұр-Сұлтанда 64 жастағы бір әйел адам Covid-19 дертінен қайтыс болды. 25 наурызда Алматыда бір, Нұр-Сұлтанда бір науқас дертінен айыққан еді.
Шымкентте әуежай және темір жол вокзалы жұмысын тоқтатады
28 наурыз түнгі сағат 00.00-ден бастап Шымкент қаласында коронавирусқа байланысты әуежай мен темір жол вокзалдардың жұмысы толық тоқтайды. Бұл туралы Қазақстанда коронавируспен күрес штабы хабарлады.
Сенбі күннен бастап көлік базарлары, азық-түлік жәрмеңкелері, ұялы телефон дүкендері жабылады. Штаб мәлімдемесіндегі дерекке сәйкес, қалада төмендегідей шектеу шаралары енгізіледі:
- Тұрғын үйлерде, аудандарда, діни бірлестіктерде жеке, отбасылық және басқа шараларды өткізуге қатаң тыйым салынады;
- Сауда нысандарына баратын адамдар, сатушылар медициналық маск тағуы тиіс, санитарлық-дезинфекциялық шараларын күшейтуі керек;
- Мал базарлары жексенбі күні ғана сағат 11.00-ден 17.00-ге дейін жұмыс істейді;
- Қоғамдық тамақтандыру орындары таңертеңгі сағат 10.00-ден 18.00-ге дейін істейді;
- Қоғамдық тамақтандыру орындары кіреберісте тұтынушылардың температурасын тексеріп, қолды санитарлық тұрғыда тазартуға мүмкіндік беруі тиіс;
- 21.00-ден 7.00-ге дейін Шымкент қаласының аумағына кіруге және шығуға тыйым салынады;
- Қоғамдық көліктер таңертеңгі сағат 6.00-ден 21.00-ге дейін жұмыс істейді.
Шымкентте короновирус жұқтырған бірінші адам 24 наурыз күні түнде анықталған. 24 жастағы ер адам қалаға 20 наурыз күні автобуспен Нұр-Сұлтан қаласынан келген. 25 наурызда оның анасынан да коронавирус табылды.
Қала әкімі Шымкентте вирус жұқтырған адаммен бірге Нұр-Сұлтаннан 51 адам келгенін, олардың төртеуі Шымкентке түсіп, қалғаны Түркістан облысы Жетісай қаласына кеткенін айтқан.
Қала әкімі қазірге қалаға карантин жариялауға негіз жоқ деп мәлімдеді. 25 наурызда қаладағы барлық халыққа қызмет көрсету орталықтары жұмысын уақытша тоқтатты.
Соңғы дерек бойынша, Қазақстанда коронавирус жұқтырғандар 121 адамға жетті.
Атырау облысында коронавирус жұққан алғашқы үш адам анықталды
Қазақстан денсаулық сақтау министрлігі 27 наурыз түсте Атырау облысында үш адамнан коронавирус табылғанын хабарлады.
Елде қазір 124 адамға вирус жұққаны анықталды: Алматыда - 48 адам, Нұр-Сұлтанда - 61 адам, Қарағандыда - төрт адам, Жамбыл облысында - үш адам, Шымкентте - екі адам, Алматы облысында - бір адам, Ақтөбе облысында - бір адам, Солтүстік Қазақстан облысында - бір адам, Атырау облысында үш адам.
26 наурыз кешкісін Нұр-Сұлтанда 64 жастағы бір әйел адам Covid-19 дертінен қайтыс болды. 25 наурызда Алматыда бір, Нұр-Сұлтанда бір науқас дертінен айыққан еді.
ПІКІРЛЕР