Әлемде вирус жұқтырғандар 400 мыңнан асты
АҚШ-тағы Джон Хопкинс университетінің дерегінше, әлемде коронавирус жұқтырғандар 409 мыңнан асты. 18246 адам қаза болды. 106593 адам дерттен айықты.
Вирус жұқтырғандар 6 наурызда 100 мыңнан, 21 наурызда 300 мыңнан, 24 наурызда 400 мыңнан асты. Дүниежүзілік денсаулық сақтау ұйымы 23 наурызда вирус өте жылдам таралып бара жатқанын айтып дабыл қаққан.
Вирус табылғандар саны бойынша бес ел:
- Қытайда 81591 адамға вирус жұққан (70 мыңдайы дерттен айықты)
- Италия – 69,176 адам
- АҚШ – 49,768 адам
- Испания – 39,676 адам
- Германия – 31,991 адам
24 наурызда Италия билігі кейінгі бір күнде 743 адам қаза болғанын мәлімдеді. Бұл елде барлығы 6820 адам опат болды. Бірақ Италияда үшінші күн қатарына вирус жұқтырғандар сәл-сәл азайып келе жатқаны байқалады.
Ресми орындар вирус жұққан соңғы төрт науқас туралы айтты
24 наурыз түнде Қазақстанда коронавирус жұққан тағы төрт азамат анықталған еді.
Сoronavirus2020.kz сайтының жазуынша, олардың бірі, 1996 жылғы Шымкент тұрғыны Нұр-Сұлтан қаласынан келген. Шымкенттегі инфекциялық ауруханаға жатқызылған. Жағдайы тұрақты.
"Науқаспен байланыста болған адамдардың бәрі анықталды. Қазір оқшауланып жатыр. Коронавирус инфекциясы таралмауы үшін Шымкентте шұғыл штаб мүшелері барлық санитарлық-эпидемиологиялық шараларды қолданып жатыр" делінген сайтта.
Вирус жұққан 1938 жылғы екінші азамат қазір Нұр-Сұлтандағы стационарда жатыр.
Үшінші науқас - 1979 жылғы азамат Жамбыл облысына Қырғызстаннан келген. Стационарға жатқызылған.
Төртінші науқас - 1993 жылғы Ресей азаматы Солтүстік Қазақстан облысына келген. Қазір стационарда жатыр.
Жаһан ғалымдары COVID-19 емін іздеп жатыр
Жер бетіне жылдам тарап, өршіп бара жатқан COVID-19 коронавирусына қарсы жер жаһанның ғалымдары вакцина іздеп жатыр. Індет тарағалы бері бірнеше елдің зерттеушілері «көп өтпей емі табылады» дегендей үміттендіріп, мәлімдеме жасап үлгерді. Бірақ ешкім де бір апта немесе бір ай деген жоқ. «Кемі алты-жеті ай, әйтпесе екі-үш керек» деседі.
Қазақстанда тағы жеті адамнан коронавирус табылды
Қазақстан денсаулық сақтау министрлігі 25 наурыз таңертең тағы жеті адамнан коронавирус табылғанын хабарлады. Нұр-Сұлтанда - бес адам, Алматыда - екі адамға вирус жұққаны анықталған.
Соңғы дерек бойынша, Қазақстанда 79 адам коронавирус жұқтырған. Алматыда - 31 адам, Нұр-Сұлтанда - 41 адам, Қарағандыда - 2 адам, Алматы облысында - бір адам, Ақтөбе облысында - бір адам, Шымкентте - бір адам, Жамбыл облысында - бір адам, Солтүстік Қазақстан облысында бір адам емделіп жатыр.
ПІКІРЛЕР