Денсаулық басқармасы Ақтөбеде коронавирус табылған науқас туралы айтты
23 наурызда Ақтөбе облыстық денсаулық сақтау басқармасы бір күн бұрын коронавирус анықталған әйелдің жағдайы туралы айтты. Ол қазір Ақтөбедегі инфекциялық ауруханада арнайы бокста жатыр.
"Науқастың жағдайы тұрақты" деді Ақтөбе облыстық денсаулық сақтау басқармасы басшысы Әсет Қалиев.
Оның айтуынша, науқас 22 наурызда Мәскеуден ұшып келген. Келген соң бірден дәрігерлер бақылауына алынған. Науқаспен бірге Мәскеуден Ақтөбеге ұшып келген 57 жолаушының арасында Нұр-Сұлтан, Қарағанды, Орал, Шымкент, Қызылорда қалаларының тұрғындары болған. Олар әуежайдан соң пойызға, самолетке, таксиге мініп, өз қалаларына кеткен. Сол жақта оқшауланған. Олардан коронавирус анықталмаған.
Жолаушылардың барлығы - Қазақстан азаматы. Науқас Ақтөбе қаласында тұрады. Басқарма дерегінше, экипаж мүшелері - Ресей азаматтары. Олар Ресейде карантинге жатқызылған.
Қазір Қазақстанда барлығы 60 адам Covid-19 дертіне шалдықты. Нұр-Сұлтанда - 31 адам, Алматы қаласында - 25 адам, Қарағанды қаласында - екі адам, Алматы облысында - бір адам, Ақтөбе облысында - бір адам коронавирус жұқтырды.
Алматыда науқастармен байланыста болған екі адамнан вирус анықталды
Алматыда соңғы тәулікте коронавирус анықталған екі адам вирус жұққан науқастармен байланыста болған деп хабарлады қалалық қоғамдық денсаулық сақтау басқармасының жетекшісі Тілеухан Әбілдаев.
"Екі науқас бұған дейін коронавирус табылған пациенттермен байланыста болған. Екеуі де карантиндік стационарда болған. Хаттамаға сәйкес коронавирустық инфекция диагностикасынан өтіп, емделіп жатыр. Науқастардың жағдайы орташа" деді ол дүйсенбі күнгі брифинг кезінде.
Оның айтуынша, қазір Алматы қалалық инфекциялық ауруханада 22 науқас жатыр. Балалар ауруханасында екі сәби мен бір сәбидің анасы (одан да коронавирус табылған) емделіп жатыр.
"Екеуінің жағдайы - орташа ауыр, қалғанының жағдайы - орташа" деді Әбілдаев.
Денсаулық сақтау басқармасы жетекшісінің айтуынша, провизорлық ауруханаларда карантинде 660 адам жатыр, бұған қоса, карантиндік нысандарда 778 адам бар. 1472 адам - үй карантинінде. Барлығының дене қызуы - қалыпты.
Алматыда тағы бір адамнан коронавирус табылды
Қазақстан денсаулық сақтау министрлігі 23 наурыз түс кезінде Алматыда тағы бір адамнан коронавирус анықталғанын хабарлады. Науқас туралы әзірге дерек жоқ.
Қазір Қазақстанда барлығы 61 адам Covid-19 дертіне шалдықты. Нұр-Сұлтанда - 31 адам, Алматы қаласында - 26 адам, Қарағанды қаласында - екі адам, Алматы облысында - бір адам, Ақтөбе облысында бір адам емделіп жатыр.
Алматыға өткен түні 23 мың адам кіріп, 13 мың адам шыққан
22 наурыздан бастап Алматыдағы блокбекеттердің қатаң режиммен жұмыс істей бастағанын хабарлаған қала әкімдігінің дерегінше, 23 наурызға қараған түні қалаға 23 мыңнан астам адам кірген, 13 500-ден астам шыққан. 11 мыңнан астам жүргізуші термометриямен тексеріліп, екі адамнан дене қызуы байқалған.
"Оның біреуі Алматы облысының тұрғыны. Алатау ауданының №3 блокбекетінде болған. Дереу жедел жәрдем бригадасының дәрігер-мамандары шақырылып, тексерілді, оған катаралды ангина диагнозы қойылды. Қалаға кіргізілген жоқ, тұрғылықты жері бойынша тіркелген Іле ауданының емханасына жіберілді" делінген билік хабарламасында. Екінші адам - Алатау ауданының тұрғыны да қала ауруханасына жатқызылған.
Бұған дейін билік карантин жарияланған қаладағы блокпостардан жедел жәрдем және құтқару қызметі, коммуналды шаруашылық мамандары, жүк тасымалдайтын көліктердің кедергісіз өтетінін хабарлаған еді.
ПІКІРЛЕР