Нұр-Сұлтанда вирус жұқтырғандар арасында төрт айлық сәби бар
Нұр-Сұлтан қаласындағы вирус табылған 28 адамның ішінде төрт айлық сәби, 14 жасар бала және 60 жастан асқан егде адам бар. Бұл туралы қалалық денсаулық басқармасы хабарлады.
Нұр-Сұлтанда вирус жұқтырғандардың жасы:
- 18 жасқа дейін – екеу (біреуі – төрт айлық, екіншісі – 14 жасар бала),
- 18-29 жас – үш адам,
- 30-49 жас – 18 адам,
- 50-59 жас – төрт адам,
- 60-69 жас – бір адам.
Басқарма дерегінше, “Рамада Плаза” отелінде карантинге арналған 800 орын дайындалды. Қазір “Алау” және “Турист” қонақүйлерімен келісім жүріп жатыр. Ал қаладағы ауруханаларда коронавирустан сақтық шаралары барысында 1051 төсек қойылған. 44 реанимациялық орын дайындалған. Қазір қалада 645 адам (ішінде 62 бала бар) ауруханада карантинде.
Дүниежүзілік денсаулық сақтау ұйымы дерегінше, бұл вирус көбіне 60-65 жастан асқан адамдар үшін өте қауіпті.
Иран жұрты коронавирусқа қарсы күреске қалай бірікті?
Коронавирустан қатты зардап шегіп жатқан Иран халқы бір біріне көмектесіп, індетке қарсы жұмыла күресіп жатыр. Еріктілер мұқтаж жандарға азық-түлік апарып береді, қоғамдық орында дезинфекция жасайды, студенттер маска тігеді.
Әлемде коронавирустан қаза болғандар 11 мыңнан асып кетті
Әлемде коронавирустан қаза болғандар саны 11399 адамға жетті. Ал дертке шалдыққандар 275 мыңнан асты. Бұл туралы АҚШ-тағы Джонс Хопкинс университеті мәлімдеді. Дәр қазір Еуропа елдері Covid-19 пандемиясынан көп зардап шегіп жатыр.
21 наурыздағы дерекке сай, Италияда 4032 адам көз жұмып, 47 мыңнан аса адам вирус жұқтырған. Вирус тараған Қытайда қазірге дейін 3259 адам қайтыс болды.
Одан кейінгі орында Иран тұр. Бұл елде, ресми дерек бойынша, 1433 адам қаза тауып, 19620 адамнан вирус табылды. Ал Испанияда 1093 адам қаза болып, 21570 адам коронавирус жұқтырған.
21 наурыздағы дерекке сай, Францияда 12630 адам ауырып, 450 адам опат болды. Германияда дертке шалдыққандар 20 мыңға жуықтады. Бұл елде 68 адам өмірден өтті.
АҚШ-та 19600 адамнан вирус табылып, 260 адам көз жұмды.
Джонс Хопкинс университетінің дерегінше, Ұлыбританияда 178 адам қаза тапқан. 21 мың адам дертке шалдықты.
Қырғызстан 22 наурыздан бастап төтенше жағдай жарияламақ
Қырғызстан премьер-министрі Мұхаммедкали Абылгазиев бүкіл елде 22 наурыздан бастап бір айға төтенше жағдай жарияланатынын мәлімдеді.
Төтенше жағдай кезінде ішкі әуе рейстерінің ұшуы қайта қаралып, адамдар көп жиналатын орындардың жұмысы шектелмек. Елде тек дәріханалар мен азық-түлік сататын орындардың жұмысы жалғасады.
Бішкек әкімдігі 22 наурыздан бастап қалада қоғамдық автобустар тоқтап, тек троллейбустар жүретінін мәлімдеді.
21 наурыз таңертеңгі дерек бойынша, Қырғызстанда 12 адамнан вирус табылған. Оның сегізі – Жалал Абад облысы Сузак ауданында, үшеуі – Ош облысы Ноокат ауданында, бір адам – Баткен облысы Баткен ауданында. Бұл аймақтарда төтенше жағдай.
ПІКІРЛЕР