Министр: Қазақстанда комендант сағатын енгізу жоспарда жоқ
20 наурызда Нұр-Сұлтанда өткен брифингте Қазақстан әділет министрі Марат Бекетаев "елде комендант сағаты енгізу мәселесі талқыланып жатқан жоқ" деп мәлімдеді.
"Комендант сағатын енгізуді қарастырып жатқан жоқпыз. Қазіргі төтенше жағдай режимі мемлекеттің барлық функциясын атқаруға және вирустың таралуын тоқтатуға жеткілікті" деді ол.
Қазақстанда 15 сәуірге дейін төтенше жағдай. 19 наурыздан бастап Алматы мен Нұр-Сұлтан қалалары карантинге көшті. Сауда және ойын-сауық орталықтары, тамақтан басқа зат сататын дүкендер мен сауда орындарының жұмысы тоқтатылды. Карантин режимі кезінде қоғамдық тамақтандыру орындары мен мейрамханалар тұтынушыға ас-суды үйіне жеткізіп береді. 22 наурыздан бастап Алматы қаласында темір жол және әуе қатынасын толық тоқтату жоспарланған.
- Авторы: Аян ҚАЛМҰРАТ
Алматы карантинге жабылған соң көмекке зәру адам көбейді
Алматылық еріктілер ұйымы 20 наурыздае бастап жұмысын тоқтатпақ. Төтенше жағдайға байланысты уақытша жабылатын мекемелер арасында қайырымдылық ұйымдары да бар.
Қазақстанның бас санитар дәрігері ауысты
Қазақстандағы төтенше жағдай кезінде елдің бас санитар дәрігері Жандарбек Бекшин қызметінен кетіп, орнына Айжан Есмағамбетова тағайындалды. Бекшин 20 наурызда денсаулық сақтау министрі Елжан Біртановтың бұйрығымен қызметінен босады. Ал жаңа бас санитар дәрігер Айжан Есмағамбетова бұрын министрліктегі қоғамдық денсаулық сақтау саясаты департаментінің директоры болып жұмыс істеген.
Бекшиннің өзі “Тауарлар мен қызметтер қауіпсіздігі және сапасын бақылау комитеті төрағасының орынбасары қызметінде қалғанын” айтты. Ол екі жылдай бас санитар дәрігер қызметін атқарды.
Наурыздың алғашқы аптасында Бекшин Қазақстанға коронавирус “ақыры” 11-16 наурызда келеді деген болжам жасаған. Оның бұл сөзі желіде әзілге айналып, түрлі мемдерге түрткі болды. Денсаулық сақтау министрі Біртанов Бекшиннің болжамы “математикалық моделдеу негізінде жасалған, болжам дәл шықпауы да мүмкін” деген.
Қазақстанда коронавирус 13 наурызда табылды. Қазір бұл елде 49 адам дертке шалдыққан (Алматыда 22, Нұр-Сұлтанда 25, Қарағандыда екі науқас).
Меккеде Қағба жабылды
Сауд Арабиясында жүздеген жыл ішінде алғаш рет Меккедегі қағба мен Мединадағы пайғамбар мешіті белгісіз уақытқа жабылды. 17 наурызда Сауд Арабиясы билігі барлық мешітте намаз оқуға тыйым салған.
20 наурыздағы дерек бойынша, Сауд Арабиясында 300 адам вирус жұқтырған. Бұл ел елге шетелдіктердің келуіне, Умра қажылыққа шектеу қойды
Әлемде коронавирус тарап жатқан тұста, бүгін әлемдегі көптеген елде жұма намазы оқылған жоқ. Қазақстан мұсылмандар діни басқарамасы да мешітте жұма намазын және бес уақыт намаз оқуға тыйым салған.
ПІКІРЛЕР