Үкімет коронавирусқа байланысты қарыз бен несие төлемін кешіктіргендерге өсімпұл салмауды ұсынды
Қазақстан үкіметі төтенше жағдайға байланысты қарызын немесе микрокредитті төлей алмаған жеке және заңды тұлғаларға айыппұл немесе өсімпұл салмауды ұсынады. Бұл туралы 17 наурызда Нұр-Сұлтанда өткен үкімет отырысында қаржы нарығын дамыту және реттеу агентігінің жетекшісі Мәдина Әбілқасымова хабарлады.
Оның сөзінше, төтенше жағдайға байланысты бұл норманы жеке және заңды тұлғаларға қарыз берген банктер мен микроқаржы ұйымдарының (ломбардтар, кредит серіктестіктері, т.б.) барлығы орындауы тиіс.
"Қазақстан Республикасындағы банктер мен банк ісі туралы" заңның 34-бабының 3-тармағы және "Микроқаржы ісі туралы" заңның 3-бабының 6-тармағына сәйкес, банктер мен микроқаржы ұйымдары төтенше жағдайға байланысты қаржы жағдайы нашарлаған жеке кәсіпкерлер мен шағын және орта бизнес субъектілеріне төлем мерзімін ұзарту жөнінде жұмыс жүргізуі керек" деді Әбілқасымова.
Президент Қасым-Жомарт Тоқаев Дүниежүзілік денсаулық сақтау ұйымының жаңа COVID-19 коронавирусын пандемия деп жариялауына байланысты Қазақстан аумағына 16 наурыз таңертеңгі сағат 8.00-ден бастап, 2020 жылғы 15 сәуір сағат 7.00-ге дейін төтенше жағдай енгізген. Шетелден оралған он үш қазақстандықтың коронавирус жұқтырғаны анықталды. Олардың он бірі Алматыда, екі адам Нұр-Сұлтанда ауруханаға жатқызылды.
Қырғызстан шетелдік азаматтардың елге келуіне уақытша шектеу енгізеді
Қырғыз үкіметі ел аумағына шетелдіктердің келуіне уақытша шектеу енгізу туралы қаулы қабылдайды. Бұл туралы 17 наурызда брифингте Қырғызстан премьер-министрінің орынбасары Алтынай Омурбекова мәлімдеді деп хабарлады Азаттықтың Қырғыз қызметі.
Шенеунік әлемде коронавирустың таралуына байланысты үкіметтің "осындай сақтық шарасы қажет" деп ұйғарғанын айтты.
"Қырғызстанда жүрген шетел азаматтары елден шығып кете алады. Қырғызстандықтардың елге оралуына кедергі жоқ" деді Алтынай Омурбекова. Оның сөзінше, елден шығатын және келетін жүк тасымалына шектеу қойылмайды.
Ресми ақпаратқа сәйкес, Қырғызстанда коронавирус жұқтырған адам жоқ. Көрші Қазақстанда вирус жұққан 13 адам, Өзбекстанда - 8 адам тіркелген.
Дүниежүзілік денсаулық сақтау ұйымы "пандемия" деп жариялаған Covid-19 коронавирусы әлемде 181 мыңнан астам адамға жұқты. Қаза болғандар саны 7 мыңнан асты. 80 мыңнан астам адам дерттен айыққан. Вирус 150-дан астам елге тарады.
Нұр-Сұлтанда 14 адамның коронавирус жұқтырғаны анықталды
17 наурызда Қазақстан денсаулық сақтау министрі Елжан Біртанов Нұр-Сұлтан қаласында тағы да 14 адамнан коронавирус табылғаны туралы хабарлады.
"Нұр-Сұлтанда тағы да 14 пациенттің коронавирус жұқтырғаны белгілі болды, диагнозы расталып, карантинге жатқызылды. Олармен байланысқан адамдардың барлығы анықталып, оқшауланып жатыр" деді Біртанов.
Бұдан бірнеше сағат бұрын Алматыда шетелден оралған үш қазақстандықтың (біреуі - екі жасар бала) вирус жұқтырғаны анықталғаны хабарланған.
Қазіргі уақытта Қазақстанда коронавирус жұқтырғандар 27-іе жетті. Елде коронавирусқа байланысты 16 наурыздан 15 сәуірге дейін төтенше жағдай режимі жарияланған.
Билік төтенше жағдай кезінде жалған ақпарат таратқандарға жаза қатаң болатынын ескертті
Қазақстанның ақпарат және қоғамдық даму министрлігі төтенше жағдай кезiнде жалған ақпарат таратқан БАҚ жауапкершілігі ауырлайтынын ескертіп, сайтына "Бұқаралық ақпарат құралдарының төтенше жағдайдағы жауапкершілігі туралы" арнайы ақпарат жариялады.
"COVID-19 пандемиясына байланысты соңғы уақытта елде көрінеу жалған ақпараттың таралуы байқалады" делінген министрлік сайтындағы ақпаратта.
Министрлік Әкімшілік құқық бұзушылық туралы кодекстің 456-1-бабының 2-бөлігінде "БАҚ-та, ақпарат иеленушінің интернет-ресурсында, ашық деректер интернет-порталында немесе Қазақстан Республикасының заңнамасында көзделген өзге де тәсілдермен көрінеу жалған ақпаратты орналастырғаны үшін" әкімшілік жауапкершілік белгіленгенін еске салған. Ведомство төтенше жағдай кезінде бұл баптан өзге аталған кодекстің "Әкiмшiлiк құқық бұзушылық үшiн жауаптылықты ауырлататын мән-жайлар" деп аталатын 57-бабының 9-тармағы ("дүлей зілзала жағдайларында немесе басқа да төтенше жағдайлар кезiнде әкiмшiлiк құқық бұзушылық жасау") іске қосылады деп жазған. Сонымен бірге төтенше жағдай кезіндегі БАҚ жауапкершілігін ауырлататын басқа да бірнеше бап пен оған қолданылатын жазаларды көрсеткен.
Қазақстан президенті Қасым-Жомарт Тоқаев Дүниежүзілік денсаулық сақтау ұйымының жаңа COVID-19 коронавирусын пандемия деп жариялауына байланысты Қазақстан аумағына 2020 жылдың 16 наурыз таңертеңгі сағат 8.00-ден бастап, 2020 жылдың 15 сәуір сағат 7.00-ге дейін төтенше жағдай енгізген.
ПІКІРЛЕР